Black Eyed Peas á Secret Solstice

Bandaríska hljómsveitin The Black Eyed Peas kemur fram á tónlistarhátíðinni Secret Solstice í júní. Frá þessu er greint í Fréttablaðinu í morgun. Þar segir að öllu verði tjaldað til og að von sé á 35 manna fylgdarliði með hljómsveitinni, þar á meðal dönsurum, ljósamönnum, hljóðmönnum og öryggisvörðum. Þetta verður í fyrsta skipti sem hljómsveitin kemur fram hér á landi.

Hljómsveitin var stofnuð árið 1995 en skaust upp á stjörnuhimininn árið 2003 með plötunni Elephunk sem innihélt meðal annars lagið Where´s the Love.

Hljómsveitin hefur unnið til sex Grammy-verðlauna og á yfir tuttugu ára ferli sveitarinnar hafa orðið til ýmsir smellir og má þar helst nefna I Gotta Feeling, My Humps, Boom Boom Pow og Let´s Get It Started. Það er því ljóst að gestir Secret Solstice mega búast við heljarinnar partýi á tónleikum hljómsveitarinnar, en hátíðin fer fram dagana 21.-23. júní. 

Von er á tilkynningu frá skipuleggjendum Secret Solstice síðar í dag um fleiri listamenn sem munu koma fram á hátíðinni í Laugardalnum í sumar og bætast í hóp The Black Eyed Peas,  Robert Plant, Rita Ora, Morcheeba, Pus­sy Riot og For­eign Begg­ars.   

Frétt af mbl.is

Robert Plant kemur fram á SS

• Blogga um frétt