Tónlistarmaðurinn R. Kelly var aftur fluttur í fangelsi á miðvikudaginn en aðeins er um vika síðan hann var látinn laus gegn tryggingu. Ástæðan fyrir fangelsisvistuninni á miðvikudaginn var þó ekki alvarlegt kynferðisbrot eins og áður heldur vangoldnar meðlagsgreiðslur.
BBC greinir frá því Kelly skuldi fyrrverandi eiginkonu sinni 160 þúsund Bandaríkjadali í meðlag eða rúmlega 19 milljónir íslenskra króna. Lögmaður Kelly sagði hann hafa átt í fjárhagsvandræðum. Kelly hefur verið sniðgenginn af mörgum auk þess sem hann missti plötusamning sinn. Var hann tilbúinn til þess að borga hluta upphæðarinnar en dómarinn tók það ekki í mál.
Kelly, sem er 52 ára gamall, neitaði sök í síðasta mánuði þegar hann kom fyrir dómara í Chicago sakaður um gróf kynferðisbrot í tíu liðum. Hann var í varðhaldi í þrjá daga en var látinn laus eftir að hafa greitt 100 þúsund Bandaríkjadali en það svarar til 10% af tryggingarfjárhæðinni sem sett var fyrir lausn hans.