Flyst Secret Solstice í Ölfus?

Elliði Vignisson, bæjarstjóri Ölfuss, fundaði í dag með forsvarsmönnum Secret Solstice-tónlistarhátíðarinnar og segir á Facebook-síðu sinni að hátíðarhaldarar horfi nú meðal annars til sveitarfélagsins Ölfuss með mögulegt samstarf í huga.

„Fundurinn núna áðan var fyrst og fremst samráðsfundur. Ekkert var klappað í stein en ákveðnir staðir í sveitarfélaginu ræddir. Allir eiga líklegustu staðirnir það sammerkt að vera vel utan þéttbýlisins í höfuðborg hamingjunnar, Þorláksheaven,“ skrifar Elliði og bætir við að samtalið við hátíðarhaldara muni halda áfram.

Nokkur óvissa hefur verið um mál Secret Solstice-hátíðarinnar, sem haldin hefur verið í Laugardal undanfarin ár. Nýir rekstraraðilar, Live Events ehf., koma nú að rekstri hátíðarinnar, en fyrri rekstraraðilar hafa verið sakaðir um vanefndir á gerðum samningum.

Hátíðin skuld­ar Reykja­vík­ur­borg um tíu millj­ón­ir króna vegna hátíðarinnar sem var hald­in síðasta sum­ar, auk þess sem umboðsaðili banda­rísku þung­arokks­sveit­ar­inn­ar Slayer hef­ur stefnt hátíðinni vegna tæp­lega sex­tán millj­óna króna skuld­ar.

Frétt af mbl.is

Secret Solstice verði haldin sama hvað

Forsvarsmenn Live Events hafa þó sagt að hátíðin verði haldin, með eða án stuðnings borgarinnar, og eins og lesa má út úr færslu Elliða virðast þeir vera að horfa í kringum sig eftir öðrum heppilegum stöðum til þess að hýsa hátíðina.

• Blogga um frétt