Söngkonan Britney Spears mætti á frumsýningu myndarinnar Once Upon a Time in Hollywood í gær ásamt kærasta sínum Sam Asghari. Var þetta í fyrsta skipti sem parið mætir saman á rauða dregilinn. Það var þó demantshringur á baugfingri Spears sem stal athygli flestra. 

Erlendir fjölmiðlar greina frá því að fólk velti því nú fyrir sér hvort Spears sé trúlofuð dansaranum. „Fyrsta frumsýningin okkar,“ skrifaði Spears á Instagram en hefur ekkert gefið upp um hvort hún sé á leið upp að altarinu aftur. Reyndar er þetta í fyrsta sinn sem söngkonan lætur sjá sig á rauða dreglinum í meira en ár. 

Spears og Asghari hafa verið saman síðan árið 2016 og virtust yfir sig ástfangin á frumsýningu nýjustu myndar Quentin Tarantino hvort sem þau eru trúlofuð eða ekki.