Chris Pratt væntanlegur til landsins

Leikarinn Chris Pratt er væntanlegur til landsins ef marka má heimildir Hollywood Reporter. Pratt mun fara með hlutverk í kvikmyndinni Ghost Draft en tökur á kvikmyndinni munu fara fram hér á landi og í Atlanta í Bandaríkjunum. 

Leikarinn J.K. Simmons hefur einnig verið orðaður við kvikmyndina en tökur munu hefjast í september. Leikstjóri kvikmyndarinnar er Chris McKay, en hann leikstýrði meðal annars The Lego Batman-kvikmyndinni.

Ghost Draft á að gerast í framtíðinni þar sem mannkynið er að tapa stríði við geimverur. Til að vinna stríðið finna vísindamenn leið til að sækja hermenn úr fortíðinni.

Chris Pratt kannast líklegast einhverjir við úr þáttunum Parks and Recreation en hann hefur einnig farið með hlutverk í ofurhetjumyndum á borð við Avengers: Infinity War og Avengers: Endgame. 

J.K. Simmons er reynslubolti úr Hollywood með Óskarsverðlaun í hillunni sem hann fékk árið 2014 fyrir hlutverk sitt í kvikmyndinni Whiplash. Hann lék einnig í kvikmynd Baltasars Kormáks, Contraband, sem kom út árið 2012.

Leikarinn J.K. Simmons er orðaður við kvikmyndina. mbl.is/AFP

• Blogga um frétt