Kex hostel verður formlegur Airwaves tónleikastaður

Kex hostel hefur verið bætt við formlega sem tónleikastað fyrir Iceland Airwaves tónlistarhátíðina, en greint er frá tónleikastöðunum í tilkynningu frá hátíðinni í dag. Þá hefur verið ákveðið að bæta við svokölluðum „on-venue“ stöðum og verða þrír slíkir staðir í ár. Bætist það við flóru „off-venue“ staða sem hafa um árabil verið stór hluti hátíðarinnar.

Hins vegar hefur hátíðin ákveðið að segja skilið við nokkra formlega staði frá í fyrra, en það eru; Bryggjan brugghús, Harpa (Flói), Húrra, Silfursalir og Sundhöllin, auk Skúla craft bar.

Formlegir tónlistarstaðir í ár verða; Fríkirkjan, Gamla bíó, Gaukurinn, Hard Rock Café, Hressingarskálinn, Iðnó, Kex hostel, Listasafn Reykjavíkur og Valshöllin.

Kex hostel hefur lengi verið stór hluti af hátíðinni með metnaðarfullri „off-venue“ dagskrá, en nú hefur verið ákveðið að taka skrefið til fulls og verður staðurinn formlegur hátíðastaður.

Nýju „on-venue“ staðirnir eru Dillon, Miami bar og Kornhlaðan, en gestir þeirra þurfa hátíðaarmbönd til að komast inn. Dagskrá þeirra staða er hins vegar ákveðin af rekstraraðilum staðanna í stað forsvarsmanna Airwaves hátíðarinnar. Getur dagskrá þeirra bæði verið yfir daginn og á kvöldin.

„Off-venue“ tónleikastaðirnir verða kynntir síðar.

• Blogga um frétt