Leikkonan Lori Loughlin og eiginmaður hennar Mossimo Giannulli hafa verið ákærð fyrir mútur. Saksóknari í Boston í Bandaríkjunum gaf út ákæruna í gær, en þeim er gefið að sök að hafa mútað starfsmönnum Háskólans í Suður-Kaliforníu. Níu aðrir foreldrar í háskólasvindlsmálinu eru einnig ákærðir fyrir mútur.

Hjónin voru ákærð fyrr á þessu ári fyrir að greiða Rick Singer, höfuðpaur háskólasvindlsmálsins svokallaða, 500 þúsund Bandaríkjadali til þess að svindla dætrum þeirra tveimur inn í háskólann. Þau hafa neitað ásökunum í málinu.

Hámarksrefsing fyrir múturnar er 5 ára fangelsisdómur en 40 ár fyrir greiðsluna til Singer. Í gær var greint frá því að saksóknari væri líklegur til að vilja semja við hjónin um refsingu þeirra. Óvíst er hvað gerist nú í málinu sökum ákærunnar um mútur. 

Mál leikkonunnar Felicity Huffman hefur haft mikil áhrif á málaferli Loughlin og Giannulli, en hún var einnig ákærð og dæmd í háskólasvindlsmálinu. Hún fékk mun vægari dóm en saksóknari fór upphaflega fram á fyrir dómara, aðeins 14 daga fangelsisdóm, 250 tíma í samfélagsvinnu og 30 þúsund Bandaríkjadala sekt. 

People hefur eftir heimildarmanni tengdum hjónunum að Loughlin og Giannulli séu skelfingu lostin yfir nýju ákærunni. „Þeim líður eins og þetta sé Davíð á móti Golíat. Hvernig vinnurðu mál gegn ríkinu, þegar ríkið hefur ákveðið að gera fordæmi úr máli þínu? Hvernig geturðu haldið áfram eftir þetta?“ sagði heimildarmaður People.