Daði Freyr snýr aftur í Söngvakeppnina

Tónlistarmaðurinn Daði Freyr Pétursson snýr aftur í Söngvakeppnina 2020. Tíu lög keppa í ár og keppnin hefst þegar fyrri undanúrslitin fara fram í Háskólabíói hinn 8. febrúar en þá munu fyrri fimm lögin keppa. Seinni undanúrslitin fara fram 15. febrúar en þá verða seinni fimm lögin flutt.  

Auk Daða eru fleiri þekktir keppendur, þar á meðal hljómsveitin DIMMA, Elísabet Ormslev, Hildur Vala og Matti Matt. Daði Freyr er að sjálfsögðu keppninni vel kunnugur en hann lenti í öðru sæti þegar Svala Björgvinsdóttir vann árið 2017.

DIMMA eiga lag. Ljósmynd/Aðsend

Tvö lög úr hvorri undankeppni komast áfram í úrslitin í gegnum símakosningu almennings.  Það verða því fjögur lög sem keppa til úrslita í Laugardalshöll 29. febrúar þegar framlag Íslands til Eurovision-söngvakeppninnar verður valið. Framkvæmdastjórn keppninnar hefur þó sem fyrr möguleika á að bæta við einu lagi í úrslitin, svokölluðu „wildcard“ eða „eitt lag enn“ eins og það er kallað í keppninni.

Kynnar í keppninni verða þau Björg Magnúsdóttir, Benedikt Valsson og Fannar Sveinsson.

Elísabet Ormslev. Ljósmynd/Aðsend

Almenningi gefst sem fyrr kostur á að vera á staðnum en miðasala hefst fimmtudaginn 23. janúar á tix.is. Undanfarin ár hefur skapast mikil fjölskyldustemning á viðburðunum sjálfum en í ár munu þeir Gunni og Felix hita áhorfendur í sal upp. Undanúrslitin og úrslitin verða í beinni útsendingu á RÚV.

Reglum samkvæmt verða lögin flutt á íslensku en í úrslitunum mega höfundar ráða hvort lag þeirra verður flutt á íslensku eða á öðru tungumáli. 

Í keppninni í ár hafa fjórir höfundar ákveðið að hafa lögin sín áfram á íslensku komist þau í úrslit, en hinir sex höfundarnir munu láta flytja sín lög á ensku. Hér að neðan má sjá enskan titil lagsins aftan við þann íslenska þegar það á við.

Matti Matt. Ljósmynd/Aðsend

Fyrri undanúrslit í Háskólabíói — 8. febrúar

Ævintýri

Flytjandi: Kid Isak

Lag: Þormóður Eiríksson, Kristinn Óli Haraldsson og Jóhannes Damian Patreksson

Texti: Þormóður Eiríksson og Kristinn Óli Haraldsson

Augun þín / In your eyes

Flytjandi: Brynja Mary

Lag: Brynja Mary Sverrisdóttir og Lasse Qvist

Texti: Kristján Hreinsson

Enskur texti: Brynja Mary Sverrisdóttir

Almyrkvi

Flytjandi: DIMMA

Lag: DIMMA

Texti: Ingó Geirdal

Elta þig / Haunting

Flytjandi: Elísabet

Lag: Elísabet Ormslev og Zoe Ruth Erwin

Texti: Daði Freyr

Enskur texti: Zoe Ruth Erwin

Klukkan tifar / Meet me halfway

Flytjendur: Ísold og Helga

Lag: Birgir Steinn Stefánsson og Ragnar Már Jónsson

Texti: Stefán Hilmarsson

Enskur texti: Birgir Steinn Stefánsson, Ragnar Már Jónsson og Stefán Hilmarsson

Seinni undanúrslit í Háskólabíói — 15. febrúar

Gagnamagnið / Think about things

Flytjendur: Daði og Gagnamagnið

Lag, íslenskur og enskur texti: Daði Freyr

Fellibylur

Flytjandi: Hildur Vala

Lag: Hildur Vala og Jón Ólafsson

Texti: Bragi Valdimar Skúlason

Oculis Videre

Flytjandi: Iva

Lag og íslenskur texti: Íva Marín Adrichem og Richard Cameron

Enskur texti: Richard Cameron

Dreyma

Flytjandi: Matti Matt

Lag: Birgir Steinn Stefánsson og Ragnar Már Jónsson

Texti: Matthías Matthíasson

Ekkó / Echo

Flytjandi: Nína

Lag: Þórhallur Halldórsson og Sanna Martinez

Texti: Þórhallur Halldórsson og Einar Bárðarson

Enskur texti: Þórhallur Halldórsson, Christoph Baer, Donal Ryan og Sanna Martinez

Hægt er að hlusta á öll lögin á Spotify og lesa textana og sjá upplýsingar um flytjendur og höfunda á songvakeppnin.is.

• Blogga um frétt