Söngvakeppni evrópskra sjónvarpsstöðva hefur tilkynnt um ráðningu nýs framkvæmdastjóra keppninnar. Svíinn Martin Österdahl, fyrrverandi dagskrárstjóri SVT, tekur við starfi framkvæmdastjóra af Jon Ola Sand.
Þetta kemur fram í tilkynningu frá Söngvakeppninni, en þar segir að Österdahl hafi meira en tveggja áratuga langa reynslu í sjónvarpi og var hann aðalframleiðandi þegar keppnin fór fram í Svíþjóð bæði árið 2013 og 2016.
Österdahl er jafnframt sagður hafa víðtæka alþjóðlega reynslu í tónlistarbransanum, en hann hefur m.a. unnið í Bretlandi, Rússlandi, Bandaríkjunum, Þýskalandi, Hollandi og Noregi. Þá hefur hann skrifað skáldsögur sem þýddar hafa verið á tíu tungumál.