Systurnar og prinsessurnar Beatrice og Eugenie gætu tekið við konunlegum skyldum frænda síns Harrys Bretaprins og eiginkonu hans Meghan hertogaynju að mati ævisöguritarans Roberts Laceys. 

Lacey hefur fjallað um konungsfjölskylduna í verkum sínum og er einn af ráðgjöfum höfunda þáttanna The Crown. Hans mat er að Beatrice og Eugenie komi vel til greina sem arftakar Harry og Meghan. 

„Það er frekar augljóst að ein af afleiðingunum verður að Beatrice og Eugenie munu koma meira fram í sviðsljósið, ef þær vilja það,“ sagði Lacey í viðtali við Hello!.

Harry Bretaprins og Meghan hertogaynja tilkynntu fyrr á þessu ári að þau myndu láta af öllum konunglegum skyldum sínum. Það þýðir þó ekki að skyldurnar hverfi heldur munu þær færast yfir á herðar annarra meðlima bresku konungsfjölskyldunnar. Flestir í fjölskyldunni hafa nóg á sinni könnu og það þykir því ekki alls ólíklegt að Elísabet Englandsdrottning hói í þær systur. 

„Þetta er það sem fjölskyldan þarf þar sem það eru allavega 15 ár þangað til kynslóð Georgs prins stígur upp,“ sagði Lacey.

Lacey segir það kaldhæðnislegt að Beatrice og Eugenie gætu verið kallaðar til þar sem Harry sagði að líf þeirra væri sambærilegt því lífi sem hann langaði til að lifa. Þær systur eru ekki jafnmikið í sviðsljósinu og Harry, fá ekki greitt frá drottningunni og vinna báðar fulla vinnu.

Beatrice er með BA-gráðu í sagnfræði og vinnur í fjármálageiranum. Hún er varaforseti hugbúnaðarfyrirtækisins Afiniti. Eugenie er með gráðu í listasögu og enskum bókmenntum frá háskólanum í Newcastle. Hún vinnur sem listrænn stjórnandi í Hauser & Wirth í London. Auk þess eru þær verndarar fjölda góðgerðarsamtaka.

Harry og Meghan kveðja brátt. AFP

Tengdar fréttir

Megxit

Hvað er í vændum fyrir barn Harrys og Meghan?

• Myndatakan sögð „alger martröð“
• Meghan leit á Karl sem sinn annan föður
• Töluðu um að hætta fyrir brúðkaup
• Fékk mun lengri tíma en Meghan

» Fleiri tengdar fréttir

• Blogga um frétt