Mary Higgins Clark látin

Bandaríski spennusagnahöfundurinn Mary Higgins Clark er látin 92 ára að aldri.

Útgefandi hennar staðfesti þetta seint í gær.

Clark var enn að skrifa eina bók á ári þegar hún var orðin níræð og átti hún fjölmarga aðdáendur víða um heim. Hún var víða kölluð „drottning spennunnar“.

„Hún lést á friðsælan hátt í kvöld, 92 ára, umvafin fjölskyldu og vinum,“ sagði útgefandinn Simon & Schuster í tísti á Twitter.

Clark seldi yfir 100 milljónir reyfara í Bandaríkjunum og varð vinsæl á fimmtugsaldri. Bækur hennar hafa verið þýddar á yfir 35 tungumál og gerðir hafa verið sjónvarpsþættir og kvikmyndir upp úr yfir 20 þeirra.

• Blogga um frétt