Hinn ungi DeAndre Arnold, sem komst í fréttir á dögunum fyrir að neita að klippa hár sitt fyrir skólann, er mættur á Óskarsverðlaunahátíðina.

Arnold mætti sem gestur Matthew A. Cherry og Karen Rupert, leikstjóra og framleiðanda stuttmyndarinnar Hair Love sem er tilnefnd til verðlaunanna í ár.

Leikkonan Gabrielle Union og eiginmaður hennar, körfuboltamaðurinn Dwayne Wade flugu honum og móður hans frá Texas til Los Angeles.

Arnold komst í heimsfréttir fyrr á þessu ári þar sem hann neitaði að klippa hár sitt. Honum var tjáð af skólayfirvöldum í skólanum sínum í Texas-ríki að hann fengi ekki að koma í útskrift sína frá skólanum nema hann klippti hár sitt.