Tobba Marinós ráðin ritstjóri DV

Þorbjörg Marinósdóttir eða Tobba eins og hún er jafnan kölluð hefur verið ráðin ritstjóri DV. Blaðið mun halda áfram að koma út á föstudögum og mun hún ritstýra því ásamt vefnum dv.is. 

„Ég hlakka til að takast á við að ritstýra DV og dv.is. Netmiðillinn ásamt undirmiðlunum er einn sá fjölsóttasti hér á landi og nú tekur við að laga þar til í efnisvali og efnistökum. Við viljum að hann sé léttur og skemmtilegur miðill sem segi harðar fréttir í bland en sé umfram allt með vönduð efnistök. DV hefur undanfarið verið gefið út í pappír á föstudögum og því verður haldið áfram. Þar eru mikil tækifæri, að gefa út fjölbreytt helgarblað með fréttum í bland við vandað afþreyingarefni,“ segir Tobba í viðtali á dv.is. 

Spurð um ritstjórnarstefnu segir hún að henni verði breytt töluvert og hún ætli að bera virðingu fyrir viðmælendum. 

„Þegar við höfum hrundið breytingunum í framkvæmd er vonin sú að fólk muni sjá breytt blað og breyttan vef með ferskum áherslum. Virðing fyrir viðmælendum er mikilvæg og við munum leggja áherslu á það,“ segir hún.

• Blogga um frétt