Las ekki um nýja kærastann í blöðunum

Hollywoodstjörnurnar Brian Austin Green og Megan Fox tilkynntu um skilnað í vor eftir tíu ára hjónaband. Fox var fljót að finna sér nýjan mann sem hún er yfir sig ástfangin af. Green tjáði sig um skilnaðinn í nýjum hlaðvarpsþætti að því er fram kemur á vef Page Six.

Leikarinn, sem gerði garðinn frægan í unglingaþáttunum Beverly Hills 9010, neitar að hafa lesið um nýjan kærasta barnsmóður sinnar í slúðurmiðlum. 

„Ég komst að því eftir mínum eigin leiðum og meira segi ég ykkur ekki um það. Ég las ekki um það eða neitt svoleiðis,“ sagði Green í þættinum. Fox er byrjuð með rapparanum Machine Gun Kelly og segist hafa hitt tvíburasál sína. 

Frétt af mbl.is

Megan Fox tjáir sig um sambandið

„Ég held að þetta gangi eins vel og hægt er,“ sagði Green um skilnað þeirra. „Það eru engar leiðbeiningar. Það er ekki hægt að gera þetta rétt eða rangt. Við erum að læra. Það mikilvægasta er að tala reglulega saman.“

Leikararnir eiga saman þrjá syni. 

„Ég held að það sé á okkar ábyrgð og foreldra almennt hvaða áhrif þetta hefur á börnin. Hvort þetta verður mjög neikvæð upplifun eða allt í lagi og að þeim finnist þau vera örugg og elskuð,“ sagði Green um fjölskylduna og lagði áherslu á að nú væri lífið bara öðruvísi. 

Green sagðist einnig óska Fox alls hins besta í öllu. Sagði hann það væri mjög mikilvægt fyrir hana og börnin að hún væri hamingjusöm.

Megan Fox og Brian Austin Green eru að skilja. mbl.is/Cover Media

• Blogga um frétt