Will Smith sagður hérlendis

Bandaríski leikarinn Will Smith er staddur á Íslandi við tökur á sjónvarpsþætti sem hann er með í smíðum. Honum hefur sést bregða fyrir á Norðurlandi, að því er RÚV hefur eftir heimildum sínum. 

Framleiðslufyrirtækið Truenorth er sagt vera leikaranum innan handar en tökulið hans fylgir ströngum sóttvarnareglum vegna heimsfaraldurs kórónuveiru. 

Óvitað er hvaða þáttaröð Smith er nú með í smíðum en hann hefur á síðustu árum staðið að þáttaröðunum Will Smith's Bucket List og Will Smith: Off the Deep End. 

Smith hefur verið tilnefndur til fimm Golden Globe-verðlauna og tvennra Óskarsverðlauna. Þá hefur hann unnið til fernra Grammy-verðlauna og var árið 2007 kallaður valdamesti leikari Hollywood. Smith gerði fyrst garðinn frægan á níunda áratugnum sem rapparinn Fresh Prince. Síðar varð hann heimsþekktur leikari og framleiðandi. 

• Blogga um frétt