Ólafur Arnalds slær í gegn í Bretlandi

Ný plata tónlistarmannsins Ólafs Arnalds hefur blandað sér í baráttuna á breska vinsældalistanum tæpri viku eftir að hún kom út. Platan some kind of peace kom út á föstudaginn síðasta og hefur hlotið frábærar viðtökur. 

Afar óvenjulegt þykir að nýklassísk og nánast ósungin plata eins og plata Ólafs blandi sér í toppbaráttuna en hún keppir meðal annars við plötur Billie Eilish, Eltons Johns og Harrys Styles. 

Í lok vikunnar kemur í ljós í hvaða sæti some kind of peace endar en það eitt að hafa náð inn á listann er mikill árangur og í fyrsta sinn sem Ólafur nær inn á topp 40 listann í Bretlandi. 

Útvarpsstöðin BBC 6 Music hefur þar að auki valið plötuna plötu dagsins og hin virta plötubúð Rough Trade valið hana plötu mánaðarins. 

Staðan um miðja viku á breska vinsældarlistanum.

Ólafur Arnalds hefur um árabil verið í fremstu röð íslenskra tónlistarmanna og hefur undanfarin áratug sannað sig sem eitt áhrifamesta nútímatónskáld heims. Auk þess að hafa gefið út fjöldamargar plötur undir eigin nafni hefur Ólafur líka leikið með rafsveitinni Kiasmos og samið tónlist fyrir kvikmyndir og þáttaraðir á borð við Broadchurch og Defending Jacob – en fyrir þá síðarnefndu hlaut hann á dögunum tilnefningu til Emmy-verðlauna.

• Blogga um frétt