Ben Affleck hættur með kærustunni

Leikaraparið Ben Affleck og Ana de Armas er hætt saman eftir tæplega árslangt samband. Parið kynntist þegar þau léku saman í myndinni Deep Water. Stjörnurnar eru sagðar hafa skilið í góðu en framtíðarsýn þeirra flæktist fyrir sambandinu að sögn þeirra sem þekkja til. 

„Hann vildi ekki eignast fleiri börn,“ sagði heimildarmaður Page Six. „Hún er rúmlega þrítug. Þetta gerði útslagið.“ Annar heimildarmaður slúðurmiðilsins sagði Affleck væri ekki á þeim stað að hann væri til í að stofna nýja fjölskyldu. Það væri mikið að gera hjá þeim báðum og börnin hans væru í fyrsta sæti. 

„Hún sleit sambandinu. Sambandið var flókið. Ana vill ekki búa í Los Angels en Ben þarf þess auðvitað þar sem hann á börn sem búa í Los Angeles,“ sagði heimildarmaður People. Annar heimildarmaður People sagði sambandsslitin vera ákvörðun þeirra beggja. Þau væru hreinlega ekki á sama stað í lífinu. 

Frétt af mbl.is

Affleck fékk mótorhjól frá kærustunni

• Blogga um frétt