Ættingi drottningar dæmdur fyrir kynferðisbrot

Ættingi Elísabetar II Bretlandsdrottningar hefur verið dæmdur í tíu mánaða fangelsi fyrir kynferðisbrot. Simon Bowes-Lyon, jarl af Strathmore og Kinghorne, réðst á 26 ára konu á heimili sínu Glamis-kastala á Skotlandi í fyrra. Þetta kemur fram á fréttavef BBC.

Í málsgögnum kemur fram að konan fái enn martraðir og upplifi ógnarhræðslu eftir atburðinn. Bowes-Lyon játaði sök og segist sjá eftir öllu. 

„Ég vissi ekki að ég gæti hagað mér á þennan hátt en ég gerði það og verð að axla ábyrgð á verknaði mínum. Ég bið umrædda konu innilegrar afsökunar sem og fjölskyldu, vini og samstarfsmenn sem hafa orðið líka fyrir streitu af völdum þessa.“