Hvað eru mannréttindi?

Tónlistarmaðurinn Högni Egilsson tók lagið og sagði vel valin orð áður en leikur KR og Vals í Dominosdeild karla í körfubolta fór fram gærkvöldi. Högni, sem spilaði körfubolta með Val, fjallaði um mál spænska rapparans Pablos Haséls og tjáningarfrelsið. Leikmenn liðanna spiluðu í sokkum til styrktar mannréttindastarfi Amnesty International.

Sokkarnir sem körfuboltakapparnir klæddust eru hannaðir af Bergi Guðnasyni fatahönnuði og á þeim stendur „Hvað eru mannréttindi?“. Með viðburðinum vildi Íslandsdeild Amnesty International vekja athygli á að það eitt að tjá skoðanir sínar eru mannréttindi sem eru varin í alþjóðalögum. Aðgerðasinnar frá Háskólafélagi Amnesty International söfnuðu undirskriftum fyrir mál Pablos Haséls.

Spán­verj­inn Pablo Hasél var hand­tek­inn í febrúar og gert að sæta níu mánaða fang­elsis­vist eft­ir að hafa verið fund­inn sek­ur um að veg­sama hryðju­verk, og fyr­ir ærumeiðandi um­mæli í garð spænsku krún­unn­ar og rík­is­stofn­ana. Málið sner­ist um röð twitter­færslna þar sem Hasél kallaði Spán­ar­kon­ung­inn fyrr­ver­andi, Jó­hann Karl fyrsta, mafíu­leiðtoga og sakaði lög­reglu um að hafa pyntað og myrt mót­mæl­end­ur og flótta­menn.

Frétt af mbl.is

Forseti Mexíkó gagnrýnir handtöku á spænskum rappara

Viðburðurinn fór vel fram, mikill fjöldi undirskrifta safnaðist og sokkar seldust vel. Auk Bergs hönnuðu þær Anita Hirlekar og Aldís Rún sokka fyrir Amnesty. Hægt er að nálgast sokkana á vef Íslandsdeildar Amnesty, í Kiosk í Granda­garði, versl­unum Hagkaups og Ungfrúnni góðu.

Brynjar Þór Björnsson leikmaður KR í sokkunum frá Amnesty. Ljósmynd/Aðsend

• Blogga um frétt