Viðtal Opruh Winfrey við Harry Bretaprins og Meghan hertogaynju hefur valdið miklum usla undanfarna daga og hefur fengið gríðarlega mikla athygli um allan heim. Kvikmyndatónskáldið Bjarni Biering Margeirsson samdi tónlistina sem hljómaði undir í viðtalinu. 

Lagið sem um ræðir ber titilinn Sunshine In The East og er af plötunni Dust sem Bjarni gaf út í samstarfi við danska fyrirtækið Stereo Royal en fyrirtækið vinnur með bandarísku fyrirtæki við að selja tónlist til bandarískra sjónvarpsstöðva. 

„Ég fékk bara email um að þetta yrði notað. Við vissum ekki að þetta yrði svona stórt viðtal, eða þetta hefði alltaf verið stórt viðtal, en kannski ekki svona stórt. Þeir segja að það sé búið að horfa meira á þetta en Superbowl. Síðan er búið að selja þetta út um allan heim núna,“ segir Bjarni í samtali við mbl.is.

Bjarni Biering Margeirsson, kvikmyndatónskáld. Ljósmynd/Aðsend

Bjarni er með meistaragráðu í tónsmíðum en hann semur mikið af tónlist fyrir kvikmyndir og sjónvarpsþætti. Hann bjó í tæpan áratug í London en flutti hingað heim í lok árs 2019. Hann er með stúdíó á Granda í Reykjavík þar sem hann semur tónlist sína. 

Tónlist Bjarna þykir greinilega mjög konungleg en þetta er ekki í fyrsta skipti sem lag eftir hann hljómar í tengslum við hertogahjónin af Sussex. „Þetta er bara mjög fínt. Það er fínt að semja tónlist fyrir Opruh,“ segir Bjarni. 

Bjarni mun halda tónleika í samstarfi við plötufyrirtækið Curious Music hinn 21. mars næstkomandi en þeim verður streymt beint á vef Outer/Most.

Tengdar fréttir

Kóngafólk í fjölmiðlum

Opinberar nafn eftir leynilega meðgöngu

• Á að hafa eytt mikilvægum gögnum
• Eiginkonan tjáir sig í fyrsta sinn eftir skilnaðinn
• „Það mun éta þig upp að innan“
• 84 ára fyrrverandi eiginmaður Camillu kominn á fast

» Fleiri tengdar fréttir

• Blogga um frétt