Rudy Giuliani með tvenn hindberjaverðlaun

Rudy Giuliani, fyrrverandi borgarstjóri New York og lögmaður Donalds Trump fyrrverandi Bandaríkjaforseta, hlaut tvenn verðlaun á kvikmyndahátíðinni Gullna hindberið (e. Golden raspberry). Verðlaunin eru veitt fyrir verstu frammistöðuna á liðnu ári í kvikmyndageiranum og eru þannig andstaða við Óskarsverðlaunin sem veitt verða á sunnudaginn.

Giuliani fékk verðlaun bæði fyrir versta aukahlutverkið og versta samleikinn í kvikmynd Sacha Baron Cohen, Borat subsequent moviefilm. Ekki var um að ræða hlutverk sem Giuliani hafði tekið að sér, heldur er myndin svokölluð gerviheimildarmynd (e. mockumentary) þar sem Cohen og aðrir leikarar og aðstandendur myndarinnar bregða á leik í raunverulegum aðstæðum.

Í mynd­inni sést Giuliani fara með hönd­ina ofan í bux­urn­ar sín­ar á meðan hann ligg­ur á hót­el­rúmi. Í atriðinu er einnig leik­kona sem fer með hlut­verk dótt­ur Borats, sem þyk­ist vera sjón­varps­fréttamaður. Eft­ir að leik­kon­an hef­ur tekið viðtal við Giuliani fyr­ir skáldaðan íhalds­sam­an frétta­skýr­ingaþátt, fara þau inn í svefn­her­bergi inn­an um fald­ar mynda­vél­ar til að fá sér drykk, eft­ir að hún hafði stungið upp á því.

Eft­ir að hún fjar­læg­ir hljóðnem­ann hans sést þegar Giuliani, sem er 76 ára, ligg­ur á rúm­inu, snert­ir skyrt­una sína og fer með hönd­ina ofan í bux­urn­ar sín­ar. Eft­ir það kem­ur Borat inn í her­bergið og hróp­ar: „Hún er 15 ára. Hún er of göm­ul fyr­ir þig.“

Guiliani fékk síðari verðlaunin einmitt fyrir samleik með buxnarennilásnum.

Frétt af mbl.is

Gæti verið í vanda staddur vegna Borat 2

Aðrar myndir sem voru sigurvegarar á hátíðinni í ár voru Music með þrenn verðlaun, meðal annars fyrir verstu tónlist og versta kvenhlutverkið og kvenaukahlutverkið. Þá fékk heimildarmyndin Absolute Proof sem framleidd var af Mike Lindell tvenn verðlaun. Um er að ræða mynd sem full er af fölskum ásökunum sem tengjast forsetakosningunum í Bandaríkjunum í fyrra, en Lindell keypti þriggja klukkustunda sýningartíma á OANN-stöðinni í Bandaríkjunum til að sýna myndina. Stöðin setti þó mikla fyrirvara fyrir birtinguna, meðal annars að aðeins væri um skoðanir Lindell að ræða.

• Blogga um frétt