Sölvi Tryggvason með 1,5 milljónir á mánuði

Fjölmiðlamaðurinn Sölvi Tryggvason var að meðaltali með tekjur upp á 1,5 milljón á mánuði á síðasta ári að því er fram kemur í Tekjublaði DV sem kom út í dag. Sölvi hélt úti hlaðvarpsþáttunum Podcast með Sölva Tryggva og voru þættirnir á meðal vinsælustu hlaðvarpsþátta á Íslandi þar til í vor. 

Sölvi hætti með hlaðvarpsþættina í vor eftir að tvær konur stigu fram og sökuðu hann um ofbeldi. Í kjölfarið hófst ný #MeToo-bylgja hér á landi. 

Sölvi var án efa einn af tekjuhæstu hlaðvarpsstjórnendum landsins á síðasta ári. Snorri Björnsson, sem heldur úti The Snorri Björnsson Podcast Show, var til dæmis með 408 þúsund á mánuði í tekjur á síðasta ári. 

Hjörvar Hafliðason, sem stýrir Dr. Football, var með 530 þúsund á mánuði. Hjálmar Örn Jóhannsson og Helgi Jean Claessen, sem stýra þáttunum Hæhæ – Ævintýri Helga og Hjálmars, voru með örlítið lægra; Hjálmar með 356 þúsund á mánuði en Helgi 316 þúsund. 

Tinna Björk Kristinsdóttir, einn stjórnenda Þarf alltaf að vera grín, var með 298 þúsund á mánuði. 

Snorri Másson, blaðamaður á Vísi og annar stjórnenda Skoðanabræðra, var með 412 þúsund á mánuði. 

Þórunn Ívarsdóttir, áhrifavaldur og stjórnandi Þokunnar, var með 567 þúsund krónur á mánuði en Alexandra Bernharð Guðmundsdóttir, sem stýrir Þokunni með Þórunni, var með 270 þúsund á mánuði. 

Baldur Ragnarsson, tónlistarmaður og stjórnandi Drauga fortíðar, var með 336 þúsund á mánuði. Meðstjórnandi hans, tónlistarmaðurinn Flosi Þorgeirsson, var með þrjú þúsund krónum lægra eða 333 þúsund krónur á mánuði. 

Grétar Sveinn Theódórsson, almannatengil, upplýsingafulltrúi félagsmálaráðuneytisins og stjórnandi Hismisins, var með 675 þúsund krónur á mánuði.

• Blogga um frétt