Stjörnum rignir yfir nýjustu Bond-myndina
Setja bókamerki
No Time To Die, nýjasta kvikmyndin um njósnara hennar hátingar, James Bond, fær frábærar viðtökur. Myndin var frumsýnd í Royal Albert Hall og voru skærustu stjörnur bresks þjóðlífs viðstaddar til þess að berja þessa fimmtu og síðustu Bond-mynd aðalleikarans, Daniels Craigs, augum.
Kevin Maher hjá tímaritinu The Times gefur myndinni fimm stjörnur af fimm mögulegum.
„Myndin er ekki bara góð,“ segir Maher, „hún er mögnuð.“
Flestir gagnrýnendur voru á einu máli um gæði myndarinnar en margir sögðu hana þó ívið of langa. No Time To Die er 163 mínútur og er því lengsta Bond-myndin til þessa.
Umsagnir kvikmyndagagnrýnenda, sem verða raktar hér á eftir, munu ekki spilla gleðinni fyrir þeim sem bíða spenntir eftir frumsýningu myndarinnar hér á landi. Það er því óþarfi að gefa út höskuldarviðvörun (e. spoiler alert).
Flestir mjög ánægðir
Peter Bradshaw hjá breska blaðinu The Guardian gefur nýju Bond-myndinni fimm stjörnur. Hann segir að myndin fái fólk til að hugsa og að hún sé sneisafull af hasar og drama en fyndin í bland.
„Þetta er veisluborð fjarstæðu og flækja, sem snúast um gríðarstóran söguþráð sem kemur sífellt á óvart,“ segir Bradshaw.
Stephanie Zacharek frá tímaritinu Time, var þó ekki eins jákvæð. Hún segir myndina of langa og að illmennið, sem leikið er af Rami Malek, sé eitt það leiðinlegasta í sögu Bond-myndanna.
„En gleymið því öllu,“ segir Zacharek í gagnrýni sinni. „No Time To Die, ef við horfum fram hjá göllunum, er fullkomlega sniðin að aðalleikaranum, sem að mínu mati er besti Bond allra tíma.“
No Time To Die kemur í kvikmyndahús hér á landi 8. október næstkomandi.
Spá illviðri víða um land á morgun
Klúr skrif beindust einnig gegn börnum
„Það var bara allt í kássu“
Minni tafir en í sambærilegum borgum
Nota ekki jólaljós til að níðast á fólki
Neyðarástand kalli á tafarlaus viðbrögð
„Mjög bagalegt“ að klára ekki málið