Elísabet II. Bretadrottning notaði göngustaf á viðburði í Westminster Abbey í gær, þriðjudag. Stafurinn olli áhyggjum um heilsu drottningar en samkvæmt heimildum breskra götublaða notaði hún stafinn aðeins sér til þæginda. 

Drottningin lenti ekki í slysi nýlega né hefur heilsa hennar versnað. Konungshöllin hefur þó ekki svarað spurningum blaðamanna um stafinn. 

Elísabet drottning og dóttir hennar Anna prinsessa fóru saman á viðburðinn og virtust þær mæðgur hressar og kátar.

Drottningin virðist við góða heilsu þessar vikurnar þrátt fyrir að hún hafi notað stafinn í gær, en hún gróðursetti meðal annars tré með elsta syni sínum, Karli Bretaprinsi, í upphafi mánaðar. Þá var engan bilbug á henni að finna og greip hún sér skóflu til að moka.