Nicole Kidman er alltaf dugleg að tala vel um eiginmann sinn, sveitasöngvarann Keith Urban. Á frumsýningu myndarinnar Being the Ricardos sagði hún eiginmann sinn vera klettinn sinn en Kidman og Urban hafa verið gift í 15 ár.
„Ég meina, í hreinskilni sagt þá væri ég ekki hérna án hans. Svo ég segi það með ótrúlegri ást og þakklæti að hann er kletturinn minn. Hann er mér allt,“ sagði Kidman um eiginmann sinn í viðtali á vef ET.
Hjónin sem eiga saman tvær dætur héldu upp á 15 ára brúðkaupsafmæli sitt í sumar sem telst nokkuð afrek í Hollywood.
„Ég var stödd á galakvöldi með systur minni í Los Angeles og við heilluðumst báðar af honum þarna. Hann hélt ræðu þetta kvöld um móður sína og var svo einlægur. Það var þá sem hann fangaði augu mín. Systir mín hallaði sér að mér og sagði: Jæja, það gerist ekki mikið betra en þetta,“ sagði Kidman um hvernig hún kynntist honum í viðtali við Harper's Baazar í haust.
Kidman sagði í sama viðtali að þau væru ólík en málamiðlanir væru lykillinn að farsælu hjónabandi.
„Það er þrotlaus vinna að vera í hjónabandi. Við erum alltaf að vinna okkur í gegnum eitthvað. Það er hluti af ástinni. Maður þarf að gefa og taka þegar maður er ástfanginn og ég vil að maðurinn minn fái allt það besta út úr lífinu og hann vill mér það sama.“