Af hverju var konan nakin í Verbúðinni?

Aldamótakynslóðin og yngri kynslóðir ráku upp stór augu við áhorf á fyrsta þætti af Verbúðinni á sunnudagskvöldið þegar þar birtist nakin kona, sem baðaði sig í bala á balli. Eldri kynslóðir og þau sem upplifðu árin sem þættirnir gerast á, 1983 til 1991, blikkuðu hins vegar ekki auga því nakta konan kom oft fyrir á böllum hér á árum áður. 

Í Verbúðinni hét konan sem baðaði sig fyrir ballgesti Súsanna. Í raunveruleikanum heitir hún Susan Hasslund og er ættuð frá Árósum í Danmörku. Susan kom hingað til lands með sýningar sínar á árunum 1974 til 1981 og ferðaðist hringinn í kringum landið með sýningarnar. 

Í 33. tölublaði Vikunnar frá árinu 1978 má finna viðtal við Susan. Þar segir að Susan hafi lært barnahjúkrunarfræði og starfaði á heildsölu þegar hún væri ekki að baða sig. Þegar viðtalið var tekið hafði hún komið fjórum sinnum til Íslands og líkað vel. 

Auglýsing sem birtist í Morgunblaðinu, sunnudaginn 13. júní árið 1976. Skjáskot/Morgunblaðið

Susan baðaði sig fyrir Íslendinga mun oftar eftir það og sé því flett upp á Tímarit.is má sjá auglýsingar reglulega í blöðunum þar sem hún baðaði sig á ýmsum veitingahúsum hér á landi. Í viðtalinu við Vikuna sagðist Susan ekki hafa áhyggjur af framtíðinni, hún stefndi ekki á að baðstundir yrðu hennar framtíðarstarf þar sem hún væri menntuð í barnahjúkrun.

Síðar á níunda áratug síðustu aldar fóru nektar- og nærfatasýningar að vera meira áberandi á veitinga- og skemmtistöðum Reykjavíkurborgar. Þá steig Pan-hópurinn fram um miðjan áratuginn. Hópurinn stóð fyrir nærfata- og kynlífstækjasýningum á veitingastöðum, félagsheimilum sem og á einkastöðum. Tíu árum seinna var svo nektardansstaðurinn Bóhem opnaður við Vitastíg og gerði allt vitlaust.

Skjáskot/Tímarit.is

• Blogga um frétt