Skellti sér í snjóinn á baðfötunum

Allir dagar eru bikiní-dagar hjá leikkonunni Ninu Dobrev ef marka má nýtt myndskeið á Instagram-reikningi hennar. 

Nina Dobrev, sem þekktust er fyrir hlutverk sitt sem aðalleikkona í sjónvarpsþáttunum The Vampire Diaries á árunum 2009-2015, birti myndskeið af því þegar hún kastaði sér í blákaldan snjóskafl á baðfötum einum klæða. Fréttaveitan Page Six greindi frá. 

„Mín útgáfa af bráðnun,“ skrifaði hún við myndskeiðið sem sýnir hana fyrst í sportlegum vetrarklæðnaði en síðar í rauðu bikiníi.

Dobrev hefur verið í sambandi með snjóbrettakappanum og Ólympíumeistaranum Shaun White síðan í maí á síðasta ári. White undirbýr sig fyrir Vetrarólympíuleikana í Peking um þessar mundir en leikar hefjast í febrúar. Parið virðist njóta undirbúningstímabilsins saman í snjóþöktum brekkunum.

• Blogga um frétt