Britney baunar á systur sína

Söngkonan Britney Spears er síður en svo ánægð með viðtal sem systir hennar Jamie Lynn Spears fór í á dögunum. Britney segir systur sína hafa fengið allt upp í hendurnar á meðan hún þurfti að semja tónlistina sína sjálf og vinna fyrir sínum eigin frama. 

Britney deildi hugleiðingum sínum um viðtal Jamie Lynn í langri færslu á Twitter í gær og tók fram að hún hefði verið með hita þegar hún horfði á viðtalð. 

„Hún var aldrei í kringum mig fyrir 15 árum, af hverju eru þau að tala um það, nema vegna þess að hún vill selja bók á minn kostnað?“ skrifaði Britney. 

Jamie Lynn var í viðtali við Good Morning America fyrr í vikunni. Þar ræddi hún að stórum hluta um hvernig alkóhólismi föður þeirra, Jamie Spears, hafi haft áhrif á æskuár systranna. Fór hún í viðtal vegna útgáfu sjálfsævisögu sinnar, Things I Should Have Said.

Frétt af mbl.is

Alkóhólismi Spears hafi eyðilagt allt

Britney gagnrýndi einnig að systir hennar hefði endurblandað eitt laga hennar fyrir Disney tónlistarverðlaunin árið 2017. 

„Ég veit það hljómar kjánalega í heyrum flestra, en ég samdi flest lögin mín og systir mín var barnið. Hún þurfti aldrei að vinna fyrir neinu. Hún fékk allt upp í hendurnar,“ skrifaði Britney.

• Blogga um frétt