Rogan heitir því að gera betur

Hlaðvarpsstjórnandinn umdeildi Joe Rogan hefur heitið því að reyna að gera betur þegar kemur að umfjöllun um kórónuveirufaraldurinn í hlaðvarpi sínu The Joe Rogan Experience. Rogan hefur verið harðlega gagnrýndur af tónlistarfólkinu Neil Young og Joni Mitchell en þau fóru fram á það við Spotify að tónlist þeirra yrði fjarlægð af streymisveitunni. 

Young fór í hart í síðustu viku þegar hann gagnrýndi Rogan fyrir að deila misvísandi upplýsingum um kórónuveiruna. Hann lét fjarlægja tónlist sína og Mitchell fylgdi í kjölfarið. 

Frétt af mbl.is

Tónlist Youngs fjarlægð af Spotify

Frétt af mbl.is

Hafa áhyggjur af röngum upplýsingum á Spotify

Spotify gaf út tilkynningu um helgina og sagði að verið væri að vinna að því að bæta aðgengi að upplýsingum um heimsfaraldurinn og viðvörunarmerkingum við þætti sem fjalla um faraldurinn. 

Í um 10 mínútna löngu viðtali á Instagram í dag bað Rogan Spotify afsökunar og sagðist ætla að leggja harðar að sér að finna fólk með mismunandi skoðanir. Að meðaltali hlusta um 11 milljónir á hvern þátt Rogans. 

Hann neitaði því að deila misvísandi upplýsingum í hlaðvarpinu sínu og sagðist ekki gera annað í hlaðvarpinu sínu en að tala við fólk. 

„Ég er ekki reiður við Neil Young, ég er mikill Neil Young aðdáandi,“ sagði Rogan og lofaði Mitchell einnig. 

• Blogga um frétt