Leikstjóri Ghostbusters er látinn

Ivan Reitman, sem leikstýrði gamanmyndinni Ghostbusters og var framleiðandi Animal House, er látinn, 75 ára gamall. 

Forstjóri Sony Pictures, Tom Rothman, minntist Reitmans á Twitter og sagði hann hafa verið óaðskiljanlegan hluta af arfleið kvikmyndaversins. Fyrst og fremst hafi hann þó verið góður vinur.

„Mikill hæfileikamaður og enn betri maður; hans verður sárt saknað. Við sendum fjölskyldu hans samúðarkveðjur okkar.“

Margir aðdáendur Ghostsbursters, sem kom út árið 1984 og er ein vinsælasta gamanmynd allra tíma, hafa einnig minnst Reitmans á samfélagsmiðlum.

„Ég er verulega sorgmæddur vegna fráfalls Ivans Reitmans. Frábær náungi og kvikmyndagerðarmaður sem ég naut þeirra forréttinda að fá að þekkja og vinna með,“ sagði leikarinn Ernie Hudson, sem lék Winston Zeddemore í fyrstu og annarri Ghostbusters-myndinni og einnig í nýrri Ghostbusters-mynd sem kom út 2016.

• Blogga um frétt