Fékk Rose í hnappagatið

Kántrídrottningin Carrie Underwood kom aðdáendum sínum heldur betur í opna skjöldu undir lok tónleika sinna á Stagecoach-hátíðinni í Kaliforníu á dögunum. Fyrst byrjaði hún að syngja Guns N’ Roses-slagarann sívinsæla Sweet Child O’ Mine með bandi sínu en kynnti svo leynigest á svið: „Endilega njótið besta kvölds lífs míns með mér. Takið vel á móti Axl Rose!“ Að því sögðu gekk sá gamli staffírugur á svið og kláraði lagið eins og honum einum er lagið áður en hann taldi í annað númer, Paradise City. „Og þið sem hélduð að við værum hætt,“ sagði Underwood en hana hefur víst lengi dreymt um að syngja með Rose. 

Axl Rose í banastuði í Laugardalnum um árið. Mbl.is/Valgarður Gíslason

• Blogga um frétt