Beint: Kemst Ísland alla leið?

Fyrsta spurningin sem Systur fengu var af hverju þær ákváðu að beina athyglinni að transbörnum. Sigga svaraði spurningunni og sagði frá því að hún væri foreldri transbarns. Spurningin og svarið uppskar mikil fagnaðarlæti í salnum.

Nú fer fram blaðamannafundur með löndunum 10 sem komust áfram.

Tórínó er í norðvesturhluta Ítalíu, vonandi gengur betur að telja hér heldur en í norðvesturkjördæmi í alþingiskosningunum á síðasta ári. Krossum enn og aftur fingur.

Íslenskir áhorfendur ættu að kannast vel við einn kynnanna, en það er enginn annar en söngvarinn Mika sem gerði allt vitlaust með laginu Grace Kelly árið 2007.

Og nú fer að opna fyrir kosninguna. Þetta er ekki góð vika fyrir þau sem glíma við valkvíða, kjósa í Eurovision í dag, og í sveitarstjórnarkosningum og lokakvöldi Eurovision á laugardag.

Subwoolfer fanga yfirleitt athyglina hvert sem þeir fara. Mikil leynd hefur ríkt yfir því hver er á bak við grímuna en sagan segir að maðurinn sé TIX, sem keppti einmitt fyrir Noreg í Eurovision á síðasta ári. Blaðamaður selur það þó ekki dýrara en hann keypti það.

Þulur breska ríkisútvarpsins BBC hafði lítið að segja um framlag Íslands í ár nema „Play Jaja Ding Dong!“ og vísar þar til Eurovision kvikmyndar Will Ferrells.

Systurnar skiluðu laginu gríðarlega vel af sér og allt virðist hafa gengið vel með hljóðið. Íslensku blaðamennirnir eru allavega með gæsahúð.