Ættingjar höfundar greinar, sem var kveikjan að kvikmyndinni Top Gun frá árinu 1986, hafa stefnt Paramount Pictures-kvikmyndaverinu fyrir brot á höfundarétti, að því er fram kemur í dómsskjölum.
Þetta kemur fram í frétt AFP.
Nú um stundir er framhaldsmynd í sýningu; Top Gun: Maverick. Er um að ræða aðra Top Gun mynd Tom Cruise en fyrri myndin sló í gegn á 9. áratug síðustu aldar.
Í kvörtun sinni, sem lögð var fyrir dómstól í Kaliforníu á mánudag, halda ekkja og sonur greinahöfundarins Ehud Yonay því fram að höfundarétti Top Gun hafi verið skilað til þeirra fyrir tveimur árum. Það hafi kvikmyndaverið hins vegar hunsað við gerð framhaldsmyndarinnar.
Ekkjan og sonurinn halda því fram að framhaldið, líkt og upprunalega myndin, séu unnin úr greinum Yonay en Paramount Pictures neita því.
Ekkjan og sonurinn vilja stöðva dreifingu myndarinnar og fara fram á ótilgreindar skaðabætur.
Talsmaður kvikmyndaversins sagði fullyrðingarnar tilhæfulausar og að það myndi verjast þeim af krafti.
Miðar seldust fyrir yfir 100 milljónir bandaríkjadala á kvikmyndina Top Gun: Maverick fyrstu sýningarhelgina í Bandaríkjunum. Er þetta í fyrsta skipti sem kvikmynd sem skartar Tom Cruise í aðalhlutverki gengur svona vel á opnunarhelgi sinni í kvikmyndahúsum.
Á fyrstu þremur sýningardögunum í kvikmyndahúsum í Bandaríkjunum seldust miðar fyrir um 124 milljónir bandaríkjadala, sem er vel á sextánda milljarð íslenskra króna.