Snobb-kryddið gefur eftir

Staðfest hefur verið að tískugoðið Victoria Beckham ætli að ganga aftur til liðs við stúlknahljómsveitina Spice Girls. 

Victoria Beckham, sem stundum var kölluð Snobb-kryddið á gullaldarárum Kryddpíanna, hefur ekki komið fram á tónleikum með sveitinni í rúman áratug.

Mel C, Íþrótta-kryddið, sagði í viðtali við BBC Breakfast fyrr á þessu ári að hún hefði góða tilfinningu fyrir því að Beckham myndi gefa eftir og ganga til liðs við stúlknasveitina aftur. Samkvæmt því sem fram kemur á vefmiðlinum The Sun viðurkenndi Mel C að endurkoman hefði lengi verið til umræðu á meðal hljómsveitarmeðlima. Sagði hún að allir meðlimir bandsins hefðu oft og títt grátbeðið Beckham um að ganga til liðs við sveitina á ný.

Spice Girls var vinsælasta stúlknasveit heims á árunum 1994-2001. Í kringum aldamótin gaf hljómsveitin upp laupana en kom saman að nýju sjö árum seinna, án Victoriu Bekcham, sem ákvað að snúa sér að öðru. 

• Blogga um frétt