Útför Eiríks Guðmundssonar í dag

Útför útvarpsmannsins og rithöfundarins Eiríks Ómars Guðmundssonar fer fram í Hallgrímskirkju klukkan 13 í dag. Eiríkur lést hinn 8. ágúst síðastliðinn 52 ára að aldri. 

Eftir grunnskólanám í Bolungarvík fór Eiríkur til náms í Menntaskólanum við Sund og útskrifaðist þaðan vorið 1988. Hann lauk BA-prófi í almennri bókmenntafræði frá Háskóla Íslands árið 1991 og MA-prófi í íslenskum bókmenntum frá sama skóla 1995.

Eiríkur starfaði við dagskrárgerð á sviði menningar hjá Rás 1 Ríkisútvarpsins frá árinu 1997 og hafði lengst af umsjón með Víðsjá og Lestinni þar sem hann fjallaði um menningarmál af ýmsum toga. Fyrsta skáldsaga Eiríks, 39 þrep á leið til glötunar, kom út árið 2004. Síðan sendi hann frá sér fleiri bækur. Þá skrifaði Eiríkur fjölda ritdóma, tímaritsgreina og útvarpspistla um bókmenntir, menningu og samfélag.

Minningargreinar um Eirík má lesa í Morgunblaðinu í dag.