Gráti nær á minningartónleikum

Foo Fighters-söngvarinn Dave Grohl mátti hafa sig allan við að halda aftur af tárunum á minningartónleikum sveitarinnar um Taylor Hawkins, trommuleikara hennar til aldarfjórðungs en Hawkins fannst látinn á hótelherbergi í Bogotá í Kólumbíu í mars þar sem til stóð að sveitin spilaði á tónlistarhátíð. Hann stóð þá á fimmtugu.

Minningartónleikarnir voru haldnir í gær á Wembley-leikvanginum í Lundúnum og seldust 75.000 miðar á tónleikana upp. Enginn hörgull var á stórstirnum úr tónlistarheiminum og má þar nefna sir Paul McCartney, Queen, AC/DC, Liam Gallagher auk fjölda annarra listamanna.

Frétt af mbl.is

Eins og að missa vin

Tólf ára á trommusettinu

Ekki voru þó allir sem fram komu eins gamlir í hettunni og McCartney og aðrir eldri listamenn því hin tólf ára gamla Nandi Bushell lék á trommurnar í Foo Fighters-laginu Learn to Fly en Bushell öðlaðist heimsfrægð á samfélagsmiðlum þegar hún skoraði Grohl á hólm í trommueinvígi á meðan heimsbyggðin sat meira og minna innilokuð heima hjá sér í kórónufaraldrinum.

Frétt af mbl.is

Taylor Hawkins trymbill Foo Fighters látinn

Kynnti Grohl stúlkuna til leiks sem „einn harðskeyttasta trommara sem ég hef hitt um mína daga“. Eins kom Violet, dóttir Grohl, fram á Wembley í gær en hún þekkti Hawkins heitinn alla sína ævi. Flutti Violet lögin Grace eftir Jeff Buckley og útgáfu Amy Winehouse heitinnar af laginu Valerie á meðan faðir hennar fylgdist stoltur með af hliðarlínunni.

BBC

• Blogga um frétt