Tónskáldið Hildur Guðnadóttir hlýtur heiðursverðlaun fyrir framlag sitt til kvikmynda á TIFF, alþjóðlegu kvikmyndahátíðinni í Toronto, sem hófst í vikunni og stendur til 18. september.

Að því er fram kemur í vefritinu Klapptré eru verðlaunin, sem kölluð eru „TIFF Variety Artisan Award“, veitt listafólki sem borið hefur af með framúrskarandi framlagi til kvikmynda- og afþreyingarlistar. Meðal fyrri verðlaunahafa eru Ari Wegner, Terence Blanchard og Roger Deakins.

Hildur hefur hlotið fjölda verðlauna, ekki síst fyrir tónlistina í þáttunum Chernobyl og kvikmyndinni Joker, en fyrir hana hreppti hún Óskarsverðlaunin árið 2019. Hún hefur einnig hlotið Golden Globe-, BAFTA- og Grammy-verðlaun.

Hildur samdi nýverið tónlist við tvær bandarískar kvikmyndir. Önnur, Tár eftir Todd Field, var á dögunum frumsýnd á kvikmyndahátíðinni í Feneyjum, en hinni, Women Talking, leikstýrði Sarah Polley.

Tengdar fréttir

Hildur Guðnadóttir

Hildur og Lady Gaga sögulegir sigurvegarar

• Hildur í einstakri dragt á meðal stórstjarna
• Hildur ekki tilnefnd
• Hildi spáð tilnefningu
• Hildur vann

» Fleiri tengdar fréttir