Líkkista Elísabetar II Bretadrottningar var smíðuð fyrir að minnsta kosti 32 árum og er smíðuð úr enskri eik, sem orðin ill fáanleg í Bretlandi. Flestar kistur sem smíðaðar eru í dag eru í bandarískri eik.

Kista Elísabetar hefur hvílt frá því í gær í St. Giles dómkirkjunni í Edinborg í Skotlandi eftir að hún var flutt frá Balmoral-kastala, til Holyrood-kastala. Í dag mun breski flugherinn fljúga með kistuna til Lundúna og frá og með morgundeginum mun hún hvíla í Westminster Hall. 

Í kistunni er blý að konunglegri hefð, en það er notað til að varðveita líkið lengur. Blý er sagt gera kistuna loftþétta og koma í veg fyrir að raki komist inn í hana. Af þessum sökum verður hún þó þyngri og munu átta menn bera kistuna. 

Kistan er í sama stíl og kista eiginmanns drottningarinnar, Filippusar hertoga af Edinborg, sem lagður var til hvílu í apríl á síðasta ári.