Baggalútur fagnar 15 árum af jólastuði

Jólatónleikar Baggalúts hafa frá árinu 2007 verið fastur liður í jólahaldi landsmanna. Í 15 ár hefur sveitin skemmt jólaunnendum með gamanmálum, söng og hljóðfæraslætti á aðventunni.

Fyrsta jólalag Baggalúts, Jóla jólasveinn, kom hins vegar út árið 2001 og síðan þá hefur hver smellurinn rekið annan: Kósíheit par exelans, Ég kemst í jólafíling, Sagan af Jesúsi, Það koma vonandi jól ásamt fjölda annarra - og nú síðast piparhúðaði ofurdúettinn Jólin eru okkar og ítalski kraftslagarinn Styttist í það.

Miðasalan á jólatónleika Baggalúts 2022 í Háskólabíói hefst fimmtudaginn 15. september kl. 10 og má búast við að heitt verði í kolunum eins og hefð er fyrir. Jólafíklar eru beðnir um að sýna aðgát, hóf, tillitsemi og þolinmæði að því er fram kemur í tilkynningu frá hljómsveitinni. 

• Blogga um frétt