Jóakim miður sín yfir ákvörðun drottningar
Setja bókamerki
Jóakim prins, yngri sonur Margrétar Þórhildar Danadrottningar, segist vera leiður yfir ákvörðun móður sinnar um að taka titla barna hans af þeim. Greint var frá því í gær að öll fjögur börn hans muni eftir áramót missa titla sína sem prinsar og prinsessur og í stað þess verða greifar og greifynjur.
„Það er aldrei gaman að sjá svona komið fram við börnin sín. Þau skilja ekki hvað er í gangi,“ sagði Jóakim við Ekstra bladet fyrir utan sendiráð Danmerkur í París í Frakklandi.
Fimm daga fyrirvari
Í gær greindu fjölmiðlar frá því að Jóakim hafi verið látinn vita af þessum breytingum í maí á þessu ári. Hann sagði hins vegar að svo væri ekki, hann hafi verið látinn vita af þessu með fimm daga fyrirvara.
Honum hafi áður verið sagt að þessi breyting myndi eiga sér stað þegar börnin yrðu 25 ára.
Jóakim prins á fjögur börn með tveimur konum. Eldri drengina Felix og Nikolai á hann með fyrri konu sinni og Hinrik og Aþenu á hann með núverandi eiginkonu sinni.
Málið virðist liggja þungt á Jóakim og spurður hvort þessi ákvörðun drottningar hefði áhrif á samband hans við hana sagðist hann ekki þurfa að tjá sig um það.
Meira frelsi fyrir börnin
Drottningin rökstuddi ákvörðun sína í tilkynningunni í gær og sagði að með þessu myndu barnabörn hennar búa að meira frelsi í framtíðinni. Þyrftu þau ekki að vera háð öllum þeim formlegheitum sem fylgja því að vinna fyrir dönsku konungsfjölskylduna.
Þróunin er sú sama hjá fleiri konungsfjölskyldum í Evrópu þar sem færri í fjölskyldunni sinna opinberum störfum fyrir höllina.
Kristján Danaprins er eina barnabarn Danadrottningar sem mun sinna opinberum skyldum og vera á launaskrá krúnunnar þegar hann verður fullorðinn. Hann er elsti sonur Friðriks krónprins.
Barn lést í árásinni
Forstjóri bendir á ábyrgð birgja vegna verðhækkana
„Börn heima sem maður myndi vilja hafa í skjóli“
Skattamál verði líklega „þeirra mesta klemma“
Lyklaskipti í ráðuneytunum
Lát hjóna í Neskaupstað: Ákæra gefin út
