Veröld/Fólk | mbl | 13.11.2022 | 22:45

Halda samstarfinu áfram

Kvikmyndaskóli Íslands og Julliard munu halda farsælu samstarfi sínu áfram. Ljósmynd/Aðsend

Listaháskólinn Julliard í New York hefur beðið um áframhaldandi samstarf við Kvikmyndaskóla Íslands fyrir nemendur beggja stofnana. Fulltrúar þessa fræga bandaríska háskóla eru mjög ánægðir með samstarfið.

Í febrúar síðastliðinn hóf Kvikmyndaskóli Íslands samstarf viðhinn virta bandaríska listaháskóla Julliard í New York.

Skólinn er almennt talinn einn sá besti í heimi á sviði leiklistar- og tónlistarkennslu en úr skólanum hafa útskrifast leikarar eins og Robin Williams, Jessica Chastain, Adam Driver, Laura Linney og goðsagnir í tónlistinni eins og Miles Davis, Nina Simone, Chick Corea og fleiri. Á þeim tæplega 120 árum sem skólinn hefur starfað hefur hann fest sig í sessi sem einn sá mikilvægasti í bandarískum kvikmynda-, leikhús- og tónlistarheimi.

Frétt af mbl.is

Kvikmyndaskóli Íslands í samstarf við Juilliard

Samstarfið fer þannig fram að Kvikmyndaskóli Íslands býður útskriftarnemum sínum að senda myndir til tónskáldadeildar Julliard sem tengir sína nemendur við leikstjóra frá Kvikmyndaskólanum.

Fulltrúar útskrifaðra nemenda úr Kvikmyndaskólanum í ár hafa verið Ýr Þrastardóttir sem útskrifaðist úr Deild 2 – Skapandi tækni, Stefán Arnar Alexandersson sem útskrifaðist úr sömu deild og Kolka Heimisdóttir sem útskrifaðist úr Deild 4 – Leiklist.

Á næstu árum munu útskriftarnemar Kvikmyndaskóla Íslands vera í samstarfi við efnilegustu tónskáld Julliard skólans í New York.

Börkur Gunnarsson rektor Kvikmyndaskóla Íslands segir það einstaklega ánægjulegt að virtur listaháskóli eins og Julliard hafi haft samband við Kvikmyndaskólann að fyrra bragði í byrjun árs og að þeir vilji nú halda áfram samstarfinu, sé það staðfesting á gæðum námsins í skólanum og hlakkar hann mikið til áframhaldandi samstarfs.

Kvikmyndaskóli Íslands fagnar 30 ára afmæli sínu í ár, þann 18. nóvember næstkomandi. Við skólann hafa ýmist kennt eða numið flestir þekktustu kvikmyndagerðarmenn landsins. Árið 2012 var skólinn tekinn inn í Cilect sem eru alþjóðasamtök kvikmyndaskóla.