Leikkonan Kirstie Alley lést í gær, 71 árs að aldri, eftir skammvinna baráttu við krabbamein.
Börnin hennar, Lillie Price Stevenson og William True Stevenson greindu frá andlátinu í yfirlýsingu á samfélagsmiðlum.
„Lífsgleði og ást móður okkar á börnum sínum, barnabörnum og mörgum dýrum, svo ekki sé minnst á sköpunargleði hennar, voru óviðjafnanleg,“ segir í yfirlýsingunni.
Leikkonan var þekktust fyrir hlutverk sitt sem Rebecca Howe í gamanþáttunum Staupasteini eða Cheers en hún hlaut Emmy-verðlaun fyrir frammistöðu sína í þeim þáttum.
Þá er hún einnig þekkt fyrir að hafa leikið í kvikmyndinni David's Mother og rómantísku gamanmyndinni Look Who's Talking.