Meghan hertogaynja af Sussex, eiginkona Harry Bretaprins, sakar bresku konungsfjölskylduna um að hafa lekið fölskum og neikvæðum sögum um hana í fjölmiðla.
Hún segir það hafa verið skýrt. Þegar fjallað var um einhvern annan í fjölskyldunni á neikvæðan hátt hafi skömmu seinna komið enn neikvæðari fréttir af henni í fjölmiðla til að draga athyglina að henni og frá hinni fréttinni.
Þetta kemur fram í fjórðu stiklunni fyrir heimildarþætti Harry Bretaprins og Meghan sem þau framleiddu fyrir Netflix.
„Meg varð að blóraböggli fyrir krúnuna. Þannig láku þau fréttum af henni, sama hvort þær væru sannar eða ekki, til að draga athyglina frá öðrum fréttum sem voru ekki eins góðar fyrir höllina,“ segir vinkona hennar Lucy Fraser í stiklunni.
Fyrstu þrír þættir heimildaþáttanna komu út í síðustu viku og munu seinni þrír þættirnir lenda á streymisveitunni á morgun, fimmtudag.
Harry & Meghan. Volume II: December 15. Only on Netflix. pic.twitter.com/ZfCcsieTHx
— Netflix (@netflix) December 14, 2022
Þriðja stiklan var gefin út á mánudag. Þar segir Harry Bretaprins að „þau“ hafi verið tilbúin til að ljúga opinberlega til að vernda bróður hans, Vilhjálm Bretaprins, en ekki verið tilbúin til að segja sannleikann til að vernda hann, Harry.
Óljóst er af stiklunni hvaða þau Harry á við, en hafa verið getgátur um að hann meini konungsfjölskylduna.