Eina konan á lista tekjuhæstu skemmtikrafta heims

Tónlistarkonan Taylor Swift var metin launahæsti kvenkyns skemmtikraftur heims árið 2022 af bandaríska tímaritinu Forbes. Hún er þar að auki eina konan sem komst á listann yfir tíu launahæstu skemmtikrafta heims. 

Á þriðjudag gaf tímaritið út árlegan lista yfir tekjuhæstu skemmtikrafta heims, en Swift situr í níunda sæti listans eftir að hafa þénað 92 milljónir bandaríkjadala árið 2022, sem nemur rúmum 13 milljörðum íslenskra króna á gengi dagsins í dag. 

Á síðasta ári kom tíundu stúdíóplata tónlistarkonunnar út, Midnight, sem sló met á Spotify fyrir flest streymi á einum degi. Þá seldi hún einnig flestar vínylplötur sem selst hafa á einni viku á þessari öld, en Midnight varð þar að auki mest selda plata ársins.

Rokkhljómsveitin Genesis trónar á toppnum

Rokkhljómsveitin Genesis var efst á Forbes-listanum, en hljómsveitin þénaði heilar 230 milljónir bandaríkjadala árið 2022, sem nemur rúmum 33 milljörðum íslenskra króna á gengi dagsins í dag.

Því næst kom tónlistarmaðurinn Sting sem þénaði 210 milljónir bandaríkjadala, eða rúmlega 30 milljarða íslenskra króna. Leikarinn Tyler Perry hafnaði í þriðja sæti listans, en samkvæmt Forbes þénaði hann 175 milljónir bandaríkjadala árið 2022, sem nemur rúmum 25 milljörðum íslenskra króna. 

• Blogga um frétt