Ofurfyrirsætan Heidi Klum og tónlistarmaðurinn Tom Kaulitz hafa verið gift í fjögur ár. Þau fögnuðu blóma- og ávaxtabrúðkaupinu með því að birta myndir af sér á Instagram þar sem þau sjást ansi fáklædd. 

Klum er vön því að mæta í flegnum fötum og stuttum pilsum á rauða dregilinn. Eiginmaðurinn er greinilega jafnánægður með líkamann og frúin. Hann virðist að minnsta kosti ekki hafa kippt sér upp við kroppasýninguna sem Klum sýndi heiminum á dögunum. 

Þýsku hjónin Klum og Kaulitz verða bara ástfangnari með árunum. Þau játuðust hvort öðru í leynilegri athöfn í Kaliforníu í febrúar árið 2019 en seinna sama ár buðu þau til veislu á Capri á Ítalíu. Nýlega greindi fyrirsætan frá því að hún væri opin fyrir því að eignast barn með eiginmanni sínum. Klum sem er 49 ára á fjögur börn fyrir. Kaulitz er hins vegar aðeins 33 ára og á ekki hrúgu á börnum eins og eiginkonan síunga.