Kvik­mynd­in Napó­leons­skjöl­in voru frum­sýnd í Köln í Þýskalandi um liðna helgi. Leik­stjóri mynd­ar­inn­ar, Óskar Þór Ax­els­son, seg­ir frum­sýn­ing­una hafa verið ótrú­lega skemmti­leg og fyndið að sjá mynd­ina á þýsku. 

„Var eig­in­lega al­veg ótrú­lega skemmti­legt, al­gjör­lega fram­ar von­um. Og þá er ég ekki að tala um þá staðreynd að mynd­in er „döbbuð“ á þýsku sem auðvitað er frek­ar fyndið að sjá og allt það, held­ur frek­ar bara hversu vel þetta var gert allt sam­an hjá Þýska fram­leiðslu­fyr­ir­tæki mynd­ar­inn­ar, Splendid Film,“ seg­ir Óskar Þór. 

Napó­leons­skjöl­in byggja á sam­nefndri glæpa­sögu Arn­alds Indriðason­ar en með aðal­hlut­verk fara Vi­vi­an Ólafs­dótt­ir (Leyni­lögga), Jack Fox (Ri­viera), Iain Glen (Game of Thrones), Ólaf­ur Darri Ólafs­son, Ades­uwa Oni (The Witcher), Annette Badland (Ted Lasso), Atli Óskar Fjalars­son og Þröst­ur Leó Gunn­ars­son.

Napó­leóns­skjöl­in fara í sýn­ing­ar í þýsk­um kvik­mynda­hús­um í dag.

Mik­il stemn­ing í saln­um

Mynd­in var sýnd á föstu­dags­kvöld­inu og fór Óskar í allskyns viðtöl sama dag. „Þetta var allt skipu­lagt mjög ná­kvæm­lega og vand­lega eins og við er að bú­ast af Þjóðverj­um, stór hóp­ur sem var að snú­ast í kring­um þetta og allt rann ein­sog vel smurð vél. Svo var mætt í bíóið á rauða dreg­il­inn og þar áttaði maður sig á að við erum að frum­sýna mynd fyr­ir stór­an markað. Þarna voru tug­ir ljós­mynd­ara, nokkr­ar sjón­varps­stöðvar og góður slatti af aðdá­end­um sem biðu fyr­ir utan með út­prentaðar mynd­ir fyr­ir leik­ar­ana til að árita. Mest fyr­ir Iain Glen auðvitað enda Game of Thrones svo risa­stórt, en líka fyr­ir hina og meira að segja nokkr­ir með mynd­ir af Vi­vi­an úr Leyni­löggu,“ seg­ir Óskar. 

Eft­ir sýn­ing­una sátu þau fyr­ir svör­um og seg­ir Óskar að mik­il stemn­ing hafi verið í saln­um. Þar á eft­ir var svo auðvitað haldið gott frum­sýn­ingarpartí. 

„Þýska Eurovisi­on var þetta sama kvöld í Köln, í sama stúd­íói og við skut­um í, og auðvitað mikið í gangi í kring­um það, en fjöl­miðlarn­ir voru al­veg með fókus á okk­ur líka. Allt Eurovisi­on-liðið var á sama hót­eli og við og mætt­ust því okk­ar fólk og þau á hót­el­barn­um að partý­um beggja lokn­um. All­ir þreytt­ir en í góðu stuði. Mjög skemmti­legt allt sam­an,“ seg­ir Óskar. 

Hann bæt­ir við að það hafi sömu­leiðis verið gam­an að hitta teymið frá bóka­út­gáf­unni sem gef­ur út bæk­ur Arn­ald­ar í Þýskalandi. 

„Þau gáfu að sjálf­sögðu út nýja út­gáfu með plakati mynd­ar­inn­ar fram­an á bók­inni en það er hvorki meira né minna en 19. út­gáfa bók­ar­inn­ar í Þýskalandi! Al­veg magnað hvað hún hef­ur selst vel þar í landi,“ seg­ir Óskar að lok­um.