Bond-leikkona hafði betur í dómsmáli

Franska leikkonan Eva Green vann á dögunum dómsmál gegn framleiðslufyrirtækinu White Lantern Film í hæstarétti í Lundúnum.

Leikkonan stefndi fyrirtækinu vegna vangoldinna launa, en hún hafði tekið að sér hlutverk í kvikmyndinni A Patriot og átti að fá greidda eina milljón bandaríkjadala. Fyrirtækið höfðaði hins vegar mál á móti og sagði Green hafa komið kvikmyndinni út af sporinu með því að setja fram óraunhæfar kröfur.

Síðastliðinn föstudag úrskurðaði dómarinn Michael Green að leikkonan ætti rétt á upphæðinni og vísaði kröfu White Lantern Film frá. 

Missti trúna á verkefninu

Green átti að leika hermann í kvikmyndinni, en verkefnið hófst árið 2018. Hún varð hins vegar fljótlega óróleg vegna fjármögnunarvanda sem leiddi til þess að breski framleiðandinn Jake Seal fór að taka meiri stjórn. 

Í réttarhöldum sem fóru fram í janúar voru skilaboð milli Green og framleiðsluteymisins lesin upp, en í vitnisburði sínum sagðist Green hafa viljað búa til frábæra mynd enda hafi hún orðið heilluð af handritinu. Hins vegar hafi hún misst trúna á verkefninu þegar fjármagnið var sífellt skorið niður og laun leikaranna lækkuð.

Frétt af mbl.is

B-mynd hefði eyðilagt ferilinn

• Blogga um frétt