Veröld/Fólk | mbl | 6.5.2023 | 9:43

Ritskoðun vegna fitufordóma í Blæju

Þættirnir um Blæju eru vinsælir.

Þáttur í barnasjónvarpsþáttaröðinni vinsælu um Blæju hefur verið ritskoðaður vegna fullyrðinga um fitufordóma.

Í nýjasta þætti af hundinum Blæju, sem sýndur var á sjónvarpsrás ABC í Ástralíu, mátti sjá foreldra titilpersónunnar kvarta yfir þyngd sinni.

Gagnrýnendur vildu meina að þátturinn gæti valdið áhyggjum á meðal ungra áhorfenda vegna eigin þyngdar.

Talsmaður ABC segir þáttin hafa verið ritskoðaðan og nýrri útgáfu verði dreift alþjóðlega.

Blæja, sjónvarpsþáttaröð um ævintýri lítils hvolps og fjölskyldu hennar, er sýndur á RÚV og öðrum sjónvarpsrásum, svo sem ABC, Disney+ og barnasjónvarpsrás BBC.

Þátturinn sem um ræðir fékk titilinn Hreyfing og hefst á senu þar sem pabbi Blæju vegur þyngd sína á meðan Blæja er í baði.

„Ohh... Ég þarf að fara að hreyfa mig meira,“ segir pabbinn.

„Láttu mig þekkja það,“ svarar mamma Blæju.

Pabbinn horfir á sjálfan sig í speglinum og heldur utan um magann.

„Af hverju hreyfirðu þig ekki bara meira þá?“ spyr Blæja.

Foreldrar og heilbrigðisstarfsfólk vöktu athygli á þessari senu á samfélagsmiðlum og nú er búið að klippa hana út úr þættinum.

Þá lýstu margir yfir áhyggjum af því að það hefði skaðleg áhrif á börn að horfa á fullorðna kvarta yfir líkamslögun sinni og stunda hreyfingu með það eitt að markmiði að léttast.

Aðrir vildu meina að viðbrögðin væru ýkt og þátturinn snerist um mikilvægi þess að hreyfa sig.