200 úkraínskar konur mættu í Eldborg
Setja bókamerki
Tvö hundruð úkraínskar konur sem flúðu stríðið í heimalandi sínu til Íslands, voru viðstaddar tónleikana Syngjandi vor, þar sem fjórtán íslenskir kvennakórar stigu á svið í Eldborgarsal Hörpu á laugardaginn.
Konurnar fengu boðsmiða á tónleikana og var tilgangurinn meðal annars að kynna þær fyrir íslenskum kvennakórum og hvetja þær til að ganga til liðs við þá. Við upphaf tónleikanna var þeim þakkað sérstaklega fyrir að hafa þegið boðið og fjölmennt í Eldborg.
Kvennakór Suðurnesja steig á svið með friðarmerki í úkraínsku fánalitunum um hálsinn og söng lagið What A Wonderful World, við góðar undirtektir.
Þá voru tvö lög eftir Bubba Morthens flutt á tónleikunum. Fyrst söng Senjórítukórinn Fjöllin hafa vakað og síðan fluttu Kyrjurnar lagið Fallegur dagur. Á meðal fleiri laga sem fengu að hljóma í Hörpu voru Dýrð í dauðaþögn eftir Ásgeir Trausta og Bohemian Rhapsody.
Tónleikarnir í Hörpu voru liður í landsmóti Gígjunnar, landssambandi íslenskra kvennakóra, sem var haldið í Reykjavík um helgina af Kvennakór Reykjavíkur.
Kórarnir sem sungu inn vorið í Eldborg voru: Héraðsdætur, Kvennakór Vestmannaeyja, Kvennakór Akureyrar, Jórukórinn, Kvennakór Hafnarfjarðar, Kvennakór Ísafjarðar, Kvennakór Suðurnesja, Kvennakórinn Ymur, Kvennakórinn Ljósbrá, Senjórítukórinn, Kyrjurnar, Kvennakórinn Heklurnar, Kvennakór Hornafjarðar og Kvennakór Reykjavíkur.
Yrði leiðinlegt líf án smá átaka
„Frumskylda mín að huga að börnunum mínum“
Alvarlegt flugumferðaratvik: Enski boltinn truflaði
Momika myrtur í beinni á TikTok
/frimg/1/54/53/1545350.jpg)
Hundurinn verður aflífaður eftir helgi
Svona vill almenningur hagræða ríkisrekstri
Leggur fram innanhústillögu í kjaradeilu kennara