Greina frá dánarorsök Ray Liotta

Bandaríski stórleikarinn Ray Liotta lést 67 ára að aldri hinn 26. maí 2022. Nú hefur verið greint frá dánarorsök Liotta, tæpu ári eftir skyndilegt fráfall hans.

Fram kemur á vef TMZ að leikarinn hafi látist úr bráðri hjartabilun og vökva í lungum, oft kallað lungnabjúgur. Þá er hann einnig sagður hafa þjáðst af æðakölkun, sem er þrenging í slagæðum.

Greint var frá því á síðasta ári að Liotta hefði látist í svefni í Dóminíska lýðveldinu, en hann var staddur þar við tökur á sinni nýjustu kvikmynd, Dangerous Waters. Leikarinn var trúlofaður Jacy Nittolo og átti eina dóttur.

Liotta skaust upp á stjörnuhimininn árið 1990 og var hvað þekktastur fyrir að fara með hlutverk í kvikmyndunum Goodfellas og Field of Dreams.

Frétt af mbl.is

Ray Liotta látinn 67 ára að aldri

• Blogga um frétt